Një shkencëtar bërthamor iranian u vra nga një sulm ndaj një ndërtese në Teheran të premten, sipas televizionit publik izraelit, “Kan TV”.
Ushtria izraelite nuk e ka komentuar rastin, shkruan gazeta “The Guardian”.
Televizioni “Kan TV” citoi një burim izraelit, i cili tha se shenjat fillestare tregojnë se një shkencëtar u vra përmes një sulmi me dron ndaj një banese në kryeqytetin iranian.
Kjo vjen pasi ministri i Mbrojtjes i Izraelit, Israel Katz, tha të premten se e kishte udhëzuar ushtrinë që t’i shpeshtonte sulmet ndaj “simboleve të regjimit” në Teheran, me qëllim të destabilizimit të pushtetit.
“Ne duhet t’i sulmojmë të gjitha simbolet e regjimit dhe mekanizmat e shtypjes së popullsisë, si (grupi militant) Basij dhe baza e pushtetit të regjimit, si Rojat Revolucionare” – tha Katzi në një deklaratë.
Ushtria izraelite tha se mbi 25 aeroplanë luftarakë të forcave ajrore sulmuan dhe shkatërruan më shumë se 35 objekte për ruajtjen dhe hedhjen e raketave në Iran të premten në mëngjes.
