Иако имаат искуство во угостителството, многу Македонци не можат да го докажат бидејќи работеле непријавено. А токму тоа е клучниот услов за работа во Хрватска – да се покаже листа за стаж или потврда од поранешниот работодавач за најмалку 6 месеци искуство.
Симона Цветковска од агенцијата Мацедо ХРМ објаснува дека ова е чест проблем: „Луѓето работеле кај познати, непријавени, си ја знаат работата, но без документ не ги примаат. На некои им бараат листа за стаж, на други – потврда. Без еден од тие документи, апликацијата паѓа.“
Има и примери на искусни работници со долгогодишен стаж, кои успешно се вработиле, но и на оние кои поради вакви административни пречки се откажуваат.
Од април 2025 Хрватска ги заостри правилата за странски работници – бараат потврдено искуство, одговорноста ја префрлаат и на работодавачите, а сето тоа со цел подобра заштита на странските работници.
Се проценува дека веќе над 15.000 Македонци работат на Јадранот. Херојите на туризмот, но само ако им се совпадат документите.
