Во првиот квартал од годинава забележан е пад на населението во Албанија за 883 лица, бидејќи забележани се повеќе смртни случаи отколку родени, соопшти албанскиот Институт за статистика (ИНСТАТ).
Според податоците на ИНСТАТ, бројот на новородени бележи значително намалување од 14,1 отсто во споредба со истиот период минатата година.
Во регионот на Тирана и натаму има најголем број новороденчиња или 1.750 регистрирани во првиот квартал.
Од друга страна, Ѓирокастро и понатаму има најмал број, само 76 бебиња, продолжувајќи го трендот од минатата година, кога за цела 2024 година имало само 336 новороденчиња.
Сепак, и покрај тоа што морталитетот се намалил за 5,8 проценти, бројот на починати е повисок од бројот на новородените. Само во Тирана починале 1.423 лица, додека во регионот Скадар морталитетот бележи раст од 4,3 отсто.
Во 2024 година вкупно родени се 23.310 бебиња а евидентирани се 22.102 смртни случаи, со разлика од 1.208 повеќе родени од починати.
