Вчера (07.04) по повод „Неделата на пешаците“, полициски службеници од ОВР Ресен реализираа превентивни активности од областа на сообраќајот, на повеќе локации на подрачјето на Ресен.
Целта на активностите беше да им се укаже на пешаците, но и на возачите за потребата од доследно почитување на сообраќајните правила и прописи. Воедно, преку делење на летоци изработени во соработка со РСБСП на пешаците им беше укажано како правилно да се движат, да поминуваат улица само на обележан пешачки премин, да внимаваат на возилата кои наидуваат и слично, а на возачите им беше укажано кога наидуваат на пешачки премини секогаш да возат одговорно, да ја намалат брзината или да застанат со возилото.
Исто така, и полициски службеници од СВР Битола под мото – „Брзото возење убива“ на излезите од Битола реализираа превентивна активност насочена кон возачите на моторни возила, со низа препораки за безбедно управување на моторното возило и почитување на сообраќајните прописи, додека пак од ОВР Крушево, во текот на вчерашниот ден беше реализирана превентивна активност за побезбеден сообраќај под мото- „Не користи мобилен кога возиш“.
Полициски службеници од ОВР Македонски Брод, пак, одржаа работна средба со претставниците на Локалниот совет за превенција при општината Македонски Брод, на која се разговараше за мерките за одржување на поволна безбедносна состојба на подрачјето на Македонски Брод.
