Претседавачот со Претседателството на Босна и Херцеговина, Жељка Цвијановиќ денеска во Азербејџан изјави дека ситуацијата во БиХ е „драматична“ и дека тоа е најголемата криза од потпишувањето на Дејтонскиот договор, објавија босанските медиуми.
На панел дискусијата на Глобалниот форум во Баку, Цвијановиќ рече дека БиХ е „пропадната земја во која легално и демократски избраниот претседател на Република Српска е жртва на монтиран судски прогон, инициран врз основа на одлука на нелегален и неизбран странец“.
Таа додаде дека „неизбраниот странец“, како што функционерите на Република Српска го нарекуваат високиот претставник во БиХ, Кристијан Шмит, не застапува никого и нема право да донесува закони, бидејќи тоа не е одобрено со Анекс 10 од Дејтонскиот договор, објави Претседателството на БиХ.
Цвијановиќ рече дека ова претставува „врв на неуставниот и антидејтонски странски интервенционизам, кој сериозно го контаминираше демократскиот развој, владеењето на правото и процесот на помирување во БиХ во изминатите 30 години“.
Таа изјави дека единственото решение за БиХ е „итно да се елиминираат последиците од штетните дејствија на странците, а сите идни одлуки да бидат исклучиво резултат на внатрешен дијалог меѓу демократски избраните претставници во домашните институции“.
