Претседателот Стево Пендаровски денеска го прими шефот на делегацијата на Европската Унија во Република Северна Македонија, амбасадорот Дејвид Гир.
На средбата се разговараше за политичките случувања во земјата по формирањето на преодната Влада и во пресрет на изборниот процес, како и за можностите за напредок по однос на европските аспирации на државата.
Реафирмирајќи ја европската интеграција како стратешка цел на државата, претседателот Пендаровски посочи на потребата за задржување на фокусот на реформите од страна на сите чинители во македонското општество, по успешно завршениот скрининг процес.
На средбата беа разменети и мислења за перспективите за натамошно продолжување на преговарачкиот процес, прашањата што се очекува да бидат најактуелни во преговорите, како и за конкретните придобивки од процесот.
Во тој контекст беше истакнато дека напредокот во интеграцијата на земјите од регионот во Европската Унија позитивно ќе се одрази на регионалната соработка, стабилноста и напредокот на регионот, информираат од Кабинетот на Претседателот.
