Претседателот на Социјалдемократската партија на Косово (СДПК) Дардан Молиќај бил уапсен синоќа во близина на канцелариите на приштинската телевизија Т7 поради тоа што му удрил шлаканица на полицаец за време на протестот на СДПК на 29 јануари. Косовската полиција потврди дека тој е уапсен и одреден му е притвор од 48 часа. Од полицијата велат дека претходните денови се обиделе да стапат во контакт со него, дека му оставиле порака да се пријави во полиција, а по наредба на надлежното обвинителство одлучиле да го приведат.
Снимката на приштинската телевизија покажа дека Молиќај му удрил шлаканица на полицаецот кој бил распореден да го обезбедува главниот влез во зградата на косовската влада за време на протестен митинг. Во саботата на 29 јануари неколку илјади граѓани протестираа во Приштина поради најавеното поскапување на струјата.
