Повеќекратниот наградуваниот гитарист Ал Ди Меола доживеал срцев удар за време на настап во Букурешт, но моментално е во стабилна состојба, пренесува АП.
Фотографот Драгош Критеску, кој присуствувал на неговиот настап, за агенцијата изјавил дека во еден момент гитаристот престанал да свири и се фатил за градите, а потоа полека ја напуштил сцената.
Останатите од групата свиреле уште неколку минути а потоа соопштиле дека концертот се прекинува.
Во соопштението на болницата „Багдасар-Арсени“ се наведува дека Ди Меола бил примен на кардиолошкото одделение, каде што се лекува од миокарден инфаркт.
Станува збор за еден од најценетите гитаристи на денешницата, кој во текот на животот доби бројни награди, меѓу кои и Греми. Продаде повеќе од шест милиони албуми ширум светот, а последен пат во Македонија одржа концерт во 2017 година.
