Новиот состав на Комисијата за помилување ќе биде конституиран утре, најави претседателката Гордана Сиљановска Давкова. Во него ќе бидат пензионираната судијка од Врховниот суд Милка Ристова, професорите Оливер Бачановиќ, Афет Мамути, Александра Груевска Дракулевска, Блерта Ахмеди, потоа психолог професор од Факултетот за безбедност Драгана Батиќ како и магистерот Доан Сулејмановоски.
Според претседателката на државата најважното за оваа комисија е прво, бидејќи доаѓа Нова година, а тогаш има помилувања, да го стори тоа.
Дополнително да ги свика членовите на сите претходни комисии за помилувања, за да ги чуе нивните забелешки, искуства и предлози.
Претходно шефицата на државата ги прифати оставките на членовите на Комисијата за помилување кои си поднесуваат колективна оставка од позициите откако достави листа за помилување на 23-ти октомври, за 10 осудени лица,а нивните имиња предизвикаа лавина реакции во јавноста.
