Последните двајца пациенти повредени во трагичниот пожар во дискотеката во Кочани – Ангела Бошковска (24) и Андреј Георгиев (23) – денеска беа отпуштени од Универзитетскиот клинички центар во Белград, каде што беа хоспитализирани на Клиниката за пластична и реконструктивна хирургија. Според информациите на МИА, нивниот понатамошен третман ќе продолжи во Македонија.
Ангела и Андреј упатија длабока благодарност до медицинскиот тим во Белград за грижата, пожртвуваноста и професионалноста во текот на нивното лекување.
Во знак на официјална благодарност од македонска страна, се обрати амбасадорот Никола Тупанчевски, кој изрази признание до целиот персонал на УКЦС.
Директорот на Клиниката, д-р Милан Стојичиќ, се заблагодари и на македонските и српските власти, како и на министерот за здравство Златибор Лончар, истакнувајќи дека вкупно 17 пациенти биле примени на 16 и 17 март по пожарот во дискотеката во Кочани.
– Сите пациенти кои беа примени во Ургентниот центар преживеаја и беа успешно лекувани. Денеска со радост ги испраќаме и последните двајца – рече д-р Стојичиќ.
Случајот со пожарот во Кочани ја потресе јавноста, но истовремено ја покажа и регионалната солидарност и професионалност во здравствениот систем.
