Лидерите на албанските политички партии упатија честитки во чест на 17-годишнината од независноста на Република Косово. Претседателот на Собранието Африм Гаши ја подвлече важноста на овој ден, велејќи дека изградбата на успешна демократска држава и интеграцијата на Косово се битки кои граѓаните заслужуваат да ги добијат.
„Денот на независноста на Република Косово ја изразува прославата на секој Албанец, одбележувајќи го напорниот, но триумфален пат кон слободата и независноста“,рече Африм Гаши, претседател на Собранието.
Првиот потпретседател на Владата, Изет Меџити, рече дека овој ден се сеќава на жртвата за независност и слобода на народот на Косово.
„На овој значаен ден за Косово се сеќаваме на пожртвуваноста, издржливоста и гордоста на народот кој ниту за момент не застана на патот кон слободата и независноста“, рече Изет Меџити, прв вицепремиер.
Градоначалникот на Тетово Билал Касами истакна дека овој ден е момент на гордост за албанската нација.
„Од Тетово, градот кој отсекогаш бил блиску до Косово на секој чекор, делиме не само заедничка историја, туку и иднина што ќе ја градиме заедно, со повеќе соработка, развој и напредок“, рече Билал Касами, градоначалник на Тетово.
Претседателот на ДУИ, Али Ахмети, рече дека Косово жртвувало многу за својата независност, споменувајќи ја и клучната улога на ОВК.
„Независноста на Косово е симбол на пожртвуваноста, храброста и издржливоста на албанскиот народ, кој со напорите на генерациите, со борбата на Ослободителната војска на Косово и со животите на илјадници луѓе, херои и паднати борци, успеа да го оствари својот сон за слобода и независност“, рече Али Ахмети, претседател на ДУИ.
На честитките за 17-годишнината од независноста на Косово, покрај политичките лидери, се приклучија и министри и градоначалници. За разлика од албанските лидери, македонските лидери не изразија честитки иако Косово е земјата со која Македонија има најголемо економско партнерство.
