Не бевме изненадени, туку разочарани кога откривме дека минатата власт се покажала како бескрупулозни крадци кои краделе дури и во библиотеката, реагираат денеска од ВЛЕН, откако Обвинителството за организиран криминал вчера информираше дека до основниот кривичен суд Скопје 1 поднело обвинителен акт против едно лице и обвинителен предлог против едно правно лице и 3 физички лица, во врска со изградбата на новиот културен дом во Тетово, каде треба да бидат сместени театар и библиотека.
Децениската сага за нов културен дом во Тетово, кој „изеде“ над 36 милиони евра, резултираше со обвинение за 4 лица и компанија!
„Обвинителството за организиран криминал при изградбата на тетовскиот театар и библиотека обвини за кражба од 13,5 милиони евра. Документите се манипулирани, постапките се прекршени, а службените должности се злоупотребиле од крадците на минатата власт. Казната што им ја дадовте на изборите беше заслужена, а правдата што доаѓа ја прави уште поважна. Значи, навикнавме скоро секоја вечер да слушате вести дека државниот буџет е оштетен од милиони евра. Ова се принципите според кои дејствувала претходната власт – истакнаа Луле Ќазими Ахмети од ВЛЕН.
Како што соопштија вчера од Обвинителството, обвинетите за злоупотреба на службена положба и постапка за јавен повик, со преземените дејствија во врска со новиот културен дом во Тетово, овозможиле имотна корист за правно лице во износ од 832.983.064 денари или 13,5 милиони евра. Притоа, од таму соопштија детали утврдени во рамки на истрагата, која резултираше со обвинение за 4 лица и една приватна компанија:
„Во периодот од 2014 до 2020 година во Тетово, првообвинетиот С.Ш., како сопственик и управител на обвинетото правно лице од Тетово, заедно и по претходен договор со третообвинетиот Х.Ф., тогашен директор на Националната установа Центар за култура „Иљо Антески-Смок”-Тетово, и со четвртообвинетиот А.А., претседател на Комисијата за јавни набавки, а потоа и в.д. директор на центарот за култура, свесно ги изигрувале прописите и правилата на постапката за доделување на договорот за јавна набавка и ја злоупотребиле својата службена положба и овластување.
Со дејствија што претставуваат повеќекратно остварување на исто дело, обвинетите за второбвинетото правно лице оствариле имотна корист од големи размери во износ од 832.983.064 денари. Искористувајќи исти прилики преземале повеќе временски поврзани дејствија на прифаќање усогласени понуди, времени и завршни ситуации со кои целосно бил променет предметот на договорот што се намалил од договорените 22 позиции и завршување на објектот до фаза „клуч на рака“, во завршување на само 4 позиции во фаза „затворена карабина“, без притоа да има одобрен проект за истото.
Воедно, ја зголемувале вредноста на проектот, а за да ја оправдаат склучиле 12 анекси на договорот, со што бил исплатен износ за 138.488.064 денари повеќе од првично договореното и од предвидените материјални средства за таа намена. Со така склучените анекси, иако постапката била неделива, го поделиле и го измениле предметот на склучениот договор од фаза „клуч на рака“ во фаза-затворена карабина и на тој начин овозможиле во иднина да се водат 2 нови постапки за јавни набавки и да се доделуваат нови договори за доградба-втора фаза, со што овозможиле корист за потенцијалните економски оператори во дополнителните постапки.
Во 2018 и 2021 година спровеле нови постапки за јавни набавки-едната за изработка на проектна документација фаза ентериер за објект во изградба, и втората со предмет на договор-втора фаза за изградба на нов објект за Театар и библиотека Тетово. Со склучувањето на нови договори во вкупен износ од 1.345.917.098 денари без ДДВ извршиле процентуално надминување на вредноста на основниот договор со зголемување од 93 проценти од договорената цена со основниот договор која изнесувала 694.495.000 денари без ДДВ.
Дополнително, со неизвршување на законските обврски за евидентирање и пријавување на даночни обврски и поради тоа што не изготвиле основен проект на изменета состојба, на штета на Буџетот на РСМ од средствата дополнително одобрени и наменети за проект и јавна набавка на ентериер за театарот, се задолжени и се исплаќаат значителни износи од 232.699.289 денари за данок на ДДВ, кој навремено не го евидентирале и пријавиле и од кој би биле ослободени.
Петтообвинетиот Б.М. како главен надзорен инженер во правно лице ангажирано како надзорен орган при спроведување на договорот за јавна набавка од 2015-2020 година, искористувајќи исти прилики, преземал повеќе временски поврзани дејствија на пропуштање должен надзор и на друг начин очигледно несовесно постапувал при вршење на неговите посебни овластувања.
Тој ги потпишувал градежните дневници и книги со количини според основниот проект, овозможил да бидат потпишувани анекси на договори врз основа на претходно доставени времени и завршни ситуации и да биде извршен технички прием на објектот Театар и Библиотека Тетово, иако одредбите од Законот за градење претходно требало да биде изготвен Проект на изведена состојба врз основа на новата состојба на објектот со нови количини, а имајќи предвид дека конструктивниот систем бил целосно сменет, со нов проект требало да се бараат нови конструктивни и статички анализи на објектот.
Како резултат на тоа што не бил изготвен Проектот на изведена состојба и немало решение за одобрување на измените што би било составен дел од одобрението за градење, не бил изготвен и Проект за употреба и одржување, па така објектот не може да се запише во јавните книги на недвижности. Со ваквите дејствија потешко ги повредил правата на НУЦК „Иљо Антески Смок“-Тетово, Министерство за култура и туризам.
Според деталниот опис содржан во диспозитивот на обвинението, првообвинетиот С.Ш. и второобвинетото правно лице сториле продолжено кривично дело „Злоупотреба на постапката за јавен повик, доделување на договор за јавна набавка или јавно-приватно партнерство од член 275-в од Кривичниот законик. Обвинетите Х.Ф. и А.А. сториле продолжено кривично дело „Злоупотреба на службената положба и овластување од член 353“.
Инаку, „Фокус“ пред една година ја истражуваше изградбата на новиот културен дом во Тетово, каде всушност треба да бидат сместени театар и библиотека. Притоа, нашето истражување кон крајот на ланската 2023 година откри дека се води истрага за тендерот за изградба на објектот според менуван проект, додека надзорот бил ангажиран за багатела. Покрај тоа, во постапката за опремување била елиминирана конкуренцијата од странство, па така во игра останале 2 тетовски компании, кои одржале безмалку симболична лицитација.
