Во Битола се одржа мирен протест на сточари од Пелагонија, кои на овој начин го искажаа своето незадоволство од тековната состојба во земјоделството. Главниот проблем, според нив, е нередовната исплата на субвенциите, а беа споменати и други предизвици што ги засегаат земјоделците и сточарите во регионот.
Сточарите се пожалија дека веќе три месеци откупната цена на млекото е намалена без претходна најава или објаснување, па затоа побараа од надлежните институции да ја проверат работата на млекарниците. Дополнително, велат дека за време на жетвата сѐ уште не е позната откупната цена на житото, што дополнително ги вознемирува производителите.
Покрај тоа, високиот раст на трошоците, како што се храната за добиток и разните препарати, создава дополнителен финансиски товар врз сточарите. Тие апелираат до властите да ја подобрат поддршката кон земјоделците и сточарите, како и транспарентноста во деловните процеси.
