Со замената на двете телефото камери со една, Oppo ризикува деградација на квалитетот при големо зумирање.
Според најновите информации од Кина, Oppo Find X9 Pro ќе користи еден 200 MP телефото сензор, а не две одделни телефото камери како неговиот претходник. Наместо често користениот Samsung ISOCELL HP9 сензор, компанијата се одлучила за новиот ISOCELL HP5, сензор со големина од 1/1.56″, кој досега не бил користен во перископски камери.
Изворот тврди дека квалитетот на фотографиите при 10x зумирање ќе остане добар, но не треба да се очекуваат одлични резултати над таа граница. Исто така се наведува дека оваа конфигурација нема да може да ги надмине двојните перископски објективи од моделот Find X8 Pro, што може да ги разочара корисниците на кои врвниот зум им беше клучна одлика на претходникот.
Освен 200 MP телефото камерата, Find X9 Pro ќе има и 50 MP главна камера, како и 50 MP ултраширока камера, а сето тоа ќе го движи најавениот MediaTek Dimensity 9500 чипсет, пренесува GSM Arena.
