OnePlus го претстави AI Plus Mind, алатка што паметно ги снима и организира информациите од екранот со само едно копче, отворајќи ново поглавје во личната продуктивност на паметните телефони.
Во време кога сите големи производители на мобилни телефони интегрираат вештачка интелигенција во своите уреди, OnePlus претстави едно од најпрактичните AI решенија досега – AI Plus Mind. Оваа функција им овозможува на корисниците со едно притискање на копче да зачуваат и организираат сè што е важно од екранот – од распореди и резервации до статии и пораки.
AI што знае што треба да се зачува
Преку едноставна интеракција, со притискање на новото Plus Key (физичко копче што го заменува Alert Slider-от), корисниците го активираат AI Plus Mind, кој автоматски го зачувува прикажаниот екрански содржај во „Mind Space“ – дигитален простор за организирање информации.
Кај моделите што го немаат Plus Key, како што е сегашниот OnePlus 13, функцијата се активира со повлекување три прста нагоре, со што се прави скриншот. Потоа AI го анализира контекстот и, на пример, издвојува информации за настан и автоматски ги додава во календар.
Од скриншот до дигитална меморија
Артур Лам, директор за стратегија на OxygenOS и AI во OnePlus, објаснува дека целта била да им се овозможи на корисниците да ги „организираат мислите“ со помош на технологијата.
„AI Plus Mind е многу повеќе од обична функција за скриншот. Тоа е комбинација од хардвер и софтвер која му дава моќ на корисникот да памети и управува со дигиталната содржина без напор,“ вели Лам.
Тој додава дека оваа функција е создадена како одговор на сè почестата фрагментација на дигитални информации кои се распрснати во различни апликации и сервиси.
Еко-систем на паметни AI алатки
Покрај AI Plus Mind, OnePlus најави и низа дополнителни AI функции што ќе го унапредат корисничкото искуство:
- AI VoiceScribe – снима, сумира и преведува разговори и состаноци директно во популарни апликации.
- AI Call Assistant – нуди сумирани прегледи и преводи на телефонски повици во реално време (најпрвин достапно во Индија).
- AI Translation – обединува секакви преводи во една апликација: текстуални, гласовни, преку камера и од екранот.
- AI Search – овозможува разговорно пребарување на локални фајлови, белешки и поставки со користење на природен јазик.
- AI Reframe – анализира фотографии и предлага подобар кадар врз основа на композиција и субјект.
- AI Best Face 2.0 – автоматски ги детектира затворените очи или лошите изрази на лицето во групни фотографии и ги коригира, дури и на слики од други уреди (достапно од лето преку OTA ажурирање).
Со AI Plus Mind, OnePlus нуди потенцијално покорисна имплементација на вештачката интелигенција – каде што AI активно му помага на корисникот да памети, организира и пребарува информации без напор.
Оваа функција ќе дебитира на моделот OnePlus 13s во Азија, а потоа ќе стане достапна и на други уреди ширум светот.
