Фудбалската федерација на Македонија (ФФМ) соопшти дека децата кои беа дел од финалниот турнир во Детската лига и учествуваа во проектот „Ајде на фудбал“ ќе имаат бесплатен влез на источната трибина на Националната арена „Тодор Проески“ за натпреварот Македонија – Белгија.
Одлуката доаѓа по иницијатива на претседателот на ФФМ, Масар Омерагиќ, како признание за трудот и посветеноста на повеќе од 2000 деца од 96 екипи во Детската лига, како и речиси 1000 ученици кои учествуваа во проектот за училишен фудбал.
„Со оваа иницијатива сакаме да испратиме силна порака за поддршка на младите фудбалски надежи и да ја поттикнеме љубовта кон спортот и националните селекции“, велат од ФФМ.
Источната трибина на арената ќе биде резервирана за овие млади фудбалери, кои ќе го следат натпреварот не само како навивачи, туку и како идни репрезентативци на македонскиот фудбал.
