Со растот на температурите во Македонија и доаѓањето на пролетта и летото, растат и опасностите од пожари на отворено.
Во последниве години и Македонија не останува имуна на разорни шумски пожари, кои уништија огромни површини шуми и земјоделско земјиште.
Овие пожари, поттикнати од жешките летни горештини и сушните услови, не само што влијаеја на биолошката разновидност, туку и претставуваат директна закана за руралните заедници.
Според податоците на Европскиот информациски систем за шумски пожари (ЕФФИС), дел од програмата Коперник, Македонија во текот на 2024 година изгубила 94.000 хектари шуми како резултат на пожарите. Односно изгореле 3,6 отсто од целокупната територија на државата.
Пожарите во летото 2024 година зедоа и човечка жртва. Седумдесет и петгодишен маж од кумановското село Кокошиње загина откако пожарот што беснееше во селото ја зафатил неговата куќа. Внукот успеал да ја спаси својата баба, но немал време да се врати и за својот дедо.
