Општина Ресен ќе го реновира објектот на старата пожарна во тој град и ќе го пренамени во Младински културен центар како и Центар за културно наследство на Ресен и Преспа.
Од секторот за односи со јавност на Општина Ресен информираат дека на првата работилница со невладини организации и здруженија од општината идејата на локалната самоуправа е прифатена со задоволство и конструктивно надградување.
-На работилница со локалните невладини организации и здруженија го претставивме проектот за реновирање кое е во соработка со ЦИСС организацијата и со партнерство на Домот на културата „Драги Тозија”. Учесниците сега имаат информација за тоа каков ќе биде ликот на новиот објект и сите простории што ќе се реновираат. Учесниците искажаа предлози и идеи кои може да бидат искористени за функционалност на просториите, посочија од тамошната локална самоуправа.
Општина Ресен од неодамна е вклучена и во нов меѓународен проект за урбана мобилност, а со цел решавање на проблемите во сообраќајот со акцент на јавниот транспорт.
