Министерот за транспорт и врски Александар Николоски најавува нови евтини авиолинии од Скопскиот и од Охридскиот аеродром. Во видео обраќање, тој информира дека е формирана работна група која ќе ги испитува можностите за зголемување на бројот на летови од двата аеродрома.
Новите летови, според Николоски, ќе го зголемат бројот на туристи и ќе им овозможат на македонските граѓани да патуваат поевтино.
“Формиравме работна група која ќе ги испитува сите можности за зголемување на бројот на летови од Скопскиот и од Охридскот аеродром. Нашата цел е веќе од следната година да има нови дестинации како би добиле многу повеќе туристи, а и македонските граѓани полесно и поевтино да патуваат надвор”, вели министерот.
Тој додава дека во наредниот период ќе се разговара со неколку светски компании кои нудат брзи и евтини летови. Изрази убеденост дека веќе следната година ќе има многу повеќе летови, повеќе задоволни патници, повеќе туристи.
