Неколку дена пред да почине во трагичниот пожар во „Пулс“ во Кочани, Андреј од ДНК снимил песна. Веста за последната песна на Андреј ја објави неговиот соработник, раперот Раде Врчаковски Врчак, кој откри дека по трагедијата, не можел ниту да слуша музика, ниту пак да биде активен на социјалните мрежи.
Последната песна со Андреј… Јас до вечерва не можев да слушам музика, не можев ни на Фејсбук да гледам ништо…
Уште не можам, уште закрепнувам, ама пред малку ја пуштив да ја слушнам последната песна со Андреј која ја снимавме неколку дена пред да загине. Кога му го слушнав гласот ме врати во живот!
Цела љубов и позитивна енергија на Андреј ми се врати во душата, а цела тага ми се претвори во уште поголема љубов, објави Врчак.
Детали за последната песна на Андреј се уште не се објавени и нема информација кога евентуално ќе биде пуштена во етерот.
Инаку, Врчак се врати на сцената по 15 години пауза токму со заедничка песна со ДНК, кон крајот на 2023 година. Станува збор за нумерата „Посреќна“, со музика на Панчо од ДНК и Лазар Цветковски, а со текст на Панчо и Врчак. Тогаш кажа дека работат уште на две нови песни со ДНК.
Лани пак, Врчак и ДНК одржаа концерт на плажа во Охрид пред многубројна публика и ветија нови заеднички песни.
Андреј го изгуби животот на 43 години, на 16-ти март во пожарот во Кочани, кога излегол надвор, па повторно се вратил во таканареченото кабаре „Пулс“ да спасува младинци кои останале внатре.
Панчо пак, се наоѓа на болничко лекување по повредите добиени во пожарот.
