Сите ученици на кои им се потребни имаат образовни асистенти, но недостига инфраструктурно и кадровско опремување на училиштата во Охрид.
Потребни се екипирани стручни тимови педагог, психолог, логопед, дефектолог. Поголемиот дел од училиштата во Охрид немаат соодветна инфраструктура, лифтови, тоалети, засебни простории, дидактички алатки.
Петнаесеттина образовни асистенти им помагаат на основците, а општина Охрид обезбеди шест за средните училишта.
„Ако речеме дека се доволни, не се доволни тие се само една помош која треба да биде во соработка со стручните служби и дефектолози и педагози. А знаеме дека дел од службите во училиштата не се комплетни. Ова е како еден почетен чекор којшто ќе биде олеснување и на учениците наставниците и родителите ќе се помогне во совладувањето на наставниот материјал, изјави Перчо Божиноски претседател на Советот на општина Охрид.
Во редовните паралелки влегуваат и глувите деца. Секој ученик има различни потреби, за квалитетно инклузивно образование потребни се образовни асистенти со конкретни специјалности.
„На глувите деца им треба асистент кој го зборува знаковниот јазик и тоа што го зборува професионално за да може да го научи на знаковен јазик, бидејќи ако е дете на здрави родители тоа не може да го научи правилно знаковниот јазик. Треба детето да го научи знаковниот јазик, образовниот асистент да го знае знаковниот јазик со таков образовен асистент глувото дете ќе има успеси“, изјави Славица Стефаноска, секретар во Здружението на глуви и наглуви Охрид.
Единствено училиште во Охрид каде има инфраструктурни подготовки за инклузивно образование е ОЕМУЦ Св.Наум Охридски. Со грант од ЕУ изградени се специјализирани тоалети, тактилни патеки за слепи ученици и лифт за инвалидизирани.
