Почитувани, чувствувам морална одговорност но и обврска да соопштам дека поднесов неотповиклива оставка од функцијата секретар на Градска Организација ЛДП Скопје и секакво понатамошно делување во партијата, соопшти во објава на Фејсбук Влатко Неделковски.
– Од првиот ден кога тргнав по патот на политичкиот активизам ме водеше само една парола, БОРБА И ПРАВДА! Тоа беа тешки времиња за мојата генерација и Македонија. Апсолутен режим режиран од тогашната владеачка ДПМНЕ. Секако, во тој момент се најдов на другата страна. Со чиста и искрена намера – ПРОМЕНИ. Баравме промени но добивме замени..
Правила се кршат но принципи никогаш. А кој има цврсти принципи ретко ќе залута. Така е и сега. За периодот кога парола на ЛДП беше ОБЕДИНЕТО, ХРАБРО, ГЛАСНО со чиста совест можам да кажам дека бев меѓу предводниците на таа идеја. За резултатите, активностите, заложбите, борбата, аплаузот и поддршката од членството и раководството за изминатиот период нека остане да се шепоти тивко, некој и ќе премолчи но тоа е знакот еднакво на човечноста на секоја индивидуа.
Од овој момент јас продолжувам да се борам за вистински вредности и принципи, одговорно, храбро и гласно против оваа децениска ерозија во системот. Разликата секогаш ја прават одговорни луѓе. Ова време-невреме во кое изгубивме сите ние нека биде отскочна даска и клик во умот дека се потребни ПРОМЕНИ. Стратегијата ако не можеш да ги победиш придружи им се ќе донесе само добиена битка, со рок на траење. А, нели, силата е во младите!
Сосема за крај, посакувам среќа и многу повеќе храброст во понатамошното делување! – стои во објавата.
