Дали станува збор за „аура“?
Иако оваа појава наликува на паранормални тврдења за „аури” околу живите организми, научниот пристап зад истражувањето е сериозен. Биофотоните – ултраслаби фотони што се емитуваат од живи клетки – претставуваат форма на светлина со бранова должина од 200 до 1.000 нанометри, но се толку слаби што често се губат во околниот електромагнетен шум и топлина.
Физичарот Вахид Салари и неговиот тим забележале јасна разлика во емисијата на биофотони кај живи и мртви организми. Тие користеле специјални камери за да го измерaт светлото што го емитуваат телата на четири глувци – пред и по нивната смрт – под строги контролирани услови. Резултатите покажале значително намалување на емисијата по смртта, и покрај одржувањето на телесната температура.
Од што се предизвикани овие светлосни емисии?
Слични резултати биле добиени и кај растенија како Arabidopsis thaliana и Heptapleurum arboricola, каде што повредените делови од лисјата светеле посилно од здравите. Овие светлосни емисии најверојатно се предизвикани од реактивни кислородни соединенија, кои се создаваат кога клетките се под стрес – од топлина, токсини, инфекции или недостаток на хранливи материи.
Откритието отвора можност за идни неинвазивни дијагностички алатки – следење на здравјето и стресот кај луѓе, животни и растенија преку мерење на нивната „биолошка светлина”. Истражувачите веруваат дека оваа суптилна светлина може еден ден да ни открие дали навистина блескаме од здравје.
