Балерините Стефанија Гаштарска (23) и Марија Крстевски (43) се доказ дека гените се чудо. Двете се неверојатно талентирани, а многумина ги мешаат дека се сестри. „Мајка ми кога првпат ме виде како настапувам, заплака и ми рече дека сум родена за на сцена“, вели Стефанија
Стефанија Гаштарска (23) е балетски уметник, дипломирана на Болшој балетската Академија во Москва, солист првенец во Перм Опера и Балет во Русија.
Марија Крстевски (43), мајка на Стефанија и Давид, е солист во Македонската Опера и Балет, дипломиран балетски педагог и репетитор, како и сопственик на балетското студио „АРАБЕСК“.
Руското издание на списанието „Форбс“ ја вклучи македонската балерина Стефанија Гаштарска на листата на осумте идни ѕвезди во Русија.
Дваесетгодишната Стефанија почна да се занимава со балет на девет години во ДМБУЦ „Илија Николовски-Луј“, во класата на Дафина Данилоска-Кочевска. На 15 години замина да учи во државното училиште во Перм (Русија), едно од најстарите балетски школи кои работат по Ваганова методот, а образованието го продолжи во Академијата за балет на Бољшој. На 16 години настапи во Бољшој, играјќи ја принцезата Аурора од балетот „Заспаната убавица“ на балетската гала вечер посветена на кореографот Мариус Петипа, на која настапија 240 претставници од најдобрите балетски школи во Русија.
За една сезона изигра седум главни улоги во најголемите класични дела. На гостување во театарот „Михајловски“ во Санкт Петербург играше во „Лебедово езеро“ и критичарите ја споредија со Ана Павлова.
„Мекоста и тежината на нејзиниот танц точно го одразуваат нејзиниот кореографски стил“, вели „Форбс“.
Гаштарска утре има премиера на балетот „Ромео и Јулија“, каде што ја игра главната женска улога.
