Промени во сообраќајот, значат не само нови закони и казни, туку и обезбедување на што поголем паркинг простор за ослободување на улиците и местата кои не се соодветни за паркирање на возилата.
Министерот за внатрешни работи Панче Тошковски денеска најави дека покрај законските измени за имплементирање на проектот „Безбеден град“, се работи на суштински промени на повеќе полиња од областа на сообраќајот.
Смета дека катните гаражи во иднина би требало да бидат зголемени.
-Она што јас можам да го најавам во иднина, во рамки на функционирањето на МВР е тоа дека работиме на проект за изградба на катна гаража во рамки на Министерството. Знаеме дека околку МВР се узурпира просторот со возила од страна на вработени во Министерството. Интензивно работиме да се создадат соодветни урбанистички предуслови, проектна документација и реализација на една катна гаража која би требало да обезбеди паркинг за околу 500 возила во рамки на МВР, истакна Тошковски.
Додаде дека сите треба да размислуваат за овој тип на капитални проекти.
Инаку, министерот денеска присуствуваше на јавна трибина „Безбеден град“, а ги сподели и првите резултати од засилените сообраќајни контроли кои се спроведуваат во главниот град.
