Мексико повторно е потресено од грозоморен масакр – на автопат во државата Синалоа, полицијата откри тела на 20 лица, од кои дел обезглавени, како и торба со пет човечки глави. Четири тела биле фрлени покрај патот, а дури 16 пронајдени во напуштен автомобил. Сите биле застрелани, а некои и обесени наопаку од мостот – потег што со години се користи од страна на најкрвавите картели.
Локалните извештаи велат дека телата биле оставени со порака, наводно од една фракција на Синалоа картелот, кој моментално е во внатрешна пресметка откако нивниот коосновач, „Ел Мајо“ Замбада, беше приведен и наводно киднапиран и пренесен во САД.
Фелисијано Кастро, портпарол на локалната влада, го осуди овој акт на терор и порача дека мексиканските власти ќе мора повторно да ја осмислат својата стратегија против организираниот криминал. Војската и полицијата се мобилизирани, но Синалоа останува симбол за тоа колку длабоко е вкоренето насилството.
