Новоизбраниот американски претседател Доналд Трамп им стави крај на шпекулациите дека поранешниот директор и државен секретар на ЦИА, Мајк Помпео ќе биде секретар за одбрана или пак дека ќе добие друга улога поврзана со националната безбедност, раззнавањето или дипломатијата.
Ниту поранешната амбасадорка на САД во ООН, Ники Хејли, ниту пак поранешниот државен секретар Мајк Помпео нема да бидат дел од новата администрација на новоизбраниот американски претседател Доналд Трамп. Ова беше лично потврдено од страна на Трамп на неговата социјална мрежа, кој кажа дека би сакал да им се заблагодари за нивната досегашна работа за САД и оти тој лично, многу ја ценел работата со нив и нивниот придонес за државата.
„Нема да ја поканам поранешната амбасадорка Ники Хејли и поранешниот државен секретар Мајк Помпео да се приклучат на администрацијата што во моментов се формира“, напиша Трамп.
Поранешниот директор и државен секретар на ЦИА, Мајк Помпео се сметаше за главен кандидат за секретар за одбрана или друга улога поврзана со националната безбедност, разузнавањето или дипломатијата. Поранешната гувернерка на Јужна Каролина, Ники Хејли која беше и амбасадор на САД во Обединетите нации за време на првиот мандат на Трамп се натпреваруваше со него за номинација од редовите на Републиканската партија и иако беше негов жесток критичар, ја поддржа неговата кандидатура.
Пред инаугурацијата, која традиционално се одржува на 20 јануари, Трамп има средби со потенцијалните кандидати за служба во неговата администрација. Британските медиуми во петокот објавија дека тој веќе разговарал со истакнатиот инвеститор Скот Бесент, кој е потенцијален кандидат за министер за финансии на САД.
Изборот на Трамп за позициите во владата, пошироката администрација и советодавните улоги се очекува да бидат објавени во наредните денови и недели додека неговиот транзициски тим се подготвува за републиканското враќање во Белата куќа во јануари
За време на претседателската кампања, Трамп избегнуваше директно да потврди какви било назначувања во неговата администрација, но честопати навестуваше кој би можел да биде дел од неговиот близок круг.
