Куманово сè уште меѓу градовите со високо аерозагадување. Мерните станици покажуваат дека дозволениот праг на концентрацијата на штетните честички е неколкукратно надминат. Аерозагадувањето ја полни и кумановската болница. На удар се пациентите со белодробни заболувања. Граѓаните велат се потешко се дише. Воздухот најмногу е загаден во вечерните часови. Повеќето избегнуваат престој на отворено.
„Се чувствува и тоа многу, апсолутно влијае, особено за нас постарите, најмногу порано ајде фабрики сега нема, мислам дека од автомобили и домаќинствата“, истакна кумановец.
„Се чувствува овде и во Скопје повеќе, јас дишам отежнато, сега бев на лекар“, вели друга кумановка.
„Шетам цел ден катастрофа е, посебно на кеј заминете, не знам дали палат гуми, пластика, навистина е ужас“, дополнува трет кумановец.
Од почетокот на годинава надлежните втор пат излегоа со препорачани мерки. Да се користи јавниот превоз, да се внимава што се согорува во домаќинствата и да се намалат прошетките. Градот продолжува со примена на краткорочни и долгорочни мерки за справување со аерозагадувањето. Се врши аеросолизација на улиците, јавниот превоз е бесплатен, се реализираат акции за пошумување. Се субвенционира приклучокот на гасификација, но и набавка на клима уреди.
„Ние тешко загадување во градот како тешка индустрија немаме, главниот проблем е греењето на огревно дрво и мислам дека доколку вложуваме во континуитет како општина но притоа и таму кај што ќе вложиме, граѓаните да се приклучуваат на гасификација мислам дека и го постигнеме тој ефект да го намалиме загадувањето“, истакна градоначалникот на Куманово, Максим Димитриевски.
Извршениот мониторинг покажа дека во Куманово најмногу загадуваат домаќинствата, сообраќајот и палење оган и отпад на отворено.
Анализите покажуваат и дека несоодветните урбанистички планови, изградбата на домовите околу реката, дополнително ја влошува состојбата со аерозагадување во Куманово.
