Новооткриената бактерија го променила своето однесување и се прилагодила на суровите услови во вселената.
Секој астронаут, пред да патува во вселената, поминува низ неколку дена карантин. Оваа постапка се спроведува за да се осигури дека астронаутот ќе влезе во вселената здрав, но исто така и за да се спречи пренесување на вируси или бактерии на вселенските станици што би можеле да предизвикаат проблеми за другите астронаути во иднина.
Понекогаш астронаутите, како дел од нивните здравствени истражувања, носат различни примероци од бактерии и вируси со себе во вселената, со цел да проучат како овие примероци се однесуваат во бестежинска состојба.
Но, кинеските научници беа изненадени кога, меѓу брисевите земени на кинеската вселенска станица Тјангонг, пронашле траги од бактерии што претходно не биле видени на Земјата.
Истражувачите од Пекиншкиот институт за вселенско системско инженерство и Групата за вселенска биотехнолошка технологија Шенжоу објавија дека проучувањето на бактеријата Niallia tiangongensis (како што е именувана) и слични видови би можело да биде клучно за заштитата на здравјето на астронаутите и вселенските станици.
Како што истакнаа истражувачите, кај Niallia tiangongensis откриле промени што можат да ѝ помогнат да функционира во стресните услови на вселената. Дополнителни истражувања што го следеа растот на микробите што ја населуваат околината на кинеската вселенска станица, објавени во Меѓународниот журнал за систематска и еволутивна микробиологија, покажаа дека микробиомите се разликуваат и по состав и по функција од оние што се наоѓаат на Меѓународната вселенска станица.
Кинеските научници истакнуваат дека новиот вид е поврзан со Niallia circulans, бактерија во облик на прачка која живее во почвата, но сè уште не е јасно зошто Niallia tiangongensis еволуирала на станицата.
Анализа што ја објавија неодамна откри дека новиот вид бактерии има единствена способност да го разградува желатинот како извор на азот и јаглерод, но ја изгубил способноста да користи други супстанции богати со енергија што таквите бактерии нормално ги користат на Земјата.
Кинеските научници ќе продолжат да го следат развојот и растот на овие бактерии за да добијат дополнителни сознанија за нивните способности. Тие конкретно ќе се фокусираат на тоа дали Niallia tiangongensis влијае на здравјето на астронаутите на кинеската вселенска станица. Имено, роднина на оваа бактерија може да предизвика сепса кај имунокомпромитирани пациенти, па затоа потенцијалот новооткриената бактерија да има негативно влијание врз здравјето е висок.
Сепак, треба да се напомене дека ова не е прв случај на откривање на нов вид бактерии во „чист простор“. NASA откри десетици соеви на микроби кои припаѓаат на 26 нови видови во своите „чисти соби“ каде што подготвува уреди за вселенски мисии.
Студијата што ги проучувала открила неверојатна способност на микробите да се адаптираат и да растат во „чиста средина“, што, со оглед на амбициите на човештвото да истражува други планети, би можело да претставува одреден ризик за идните вселенски мисии.
