DeepSeek без голема помпа ја објави новата верзија на својот AI модел за резонирање, кој по квалитет се приближува до OpenAI моделот o4-mini. Овој потег дополнително ја зацврстува позицијата на Кина во AI трката, и покрај американските рестрикции.
Кинескиот AI стартап DeepSeek, кој претходно годинава ги вознемири пазарите со објавување на бесплатниот, отворен модел R1, тивко ја објави неговата надградена верзија, без никакво официјално соопштение. Новиот модел се појави на платформата Hugging Face, еден од најпознатите репозиториуми за AI модели.
Без помпа, но со силен одек
Како и оригиналниот R1, и новата верзија е модел за резонирање, што значи дека користи логички чекори за решавање на посложени задачи како: програмирање, анализа или повеќестепени прашања. Иако беше објавен тивко, новиот DeepSeek R1 моментално се наоѓа веднаш зад моделите o4-mini и o3 на OpenAI на LiveCodeBench – платформа која ги рангира моделите според различни критериуми за перформанси.
Успеси кои го вознемирија Западот
Првата верзија на DeepSeek R1 ја шокираше индустријата откако ги надмина моделите на компании како Meta и OpenAI, а беше развиена со значително помал буџет и за пократко време. Тоа предизвика загриженост кај американските инвеститори и привремено ја намали вредноста на акциите на компании како Nvidia, поради стравувања дека трошоците за инфраструктура на големите компании не се исплатуваат во споредба со агилноста на новите конкуренти.
Кина не попушта, и покрај ограничувањата
Успехот на DeepSeek дополнително ја истакнува отпорноста на кинескиот AI сектор, кој напредува и покрај обидите на САД да го ограничат извозот на чипови и напредна технологија кон Кина. Во последно време, и Baidu и Tencent покажаа како ги оптимизираат своите модели во услови на тие ограничувања, нагласувајќи ја ефикасноста и прилагодливоста кон постоечкиот хардвер.
Новиот модел на DeepSeek не само што ја потврдува техничката зрелост на кинеските AI тимови, туку и сугерира промена во динамиката на глобалната AI трка. Додека Западот инвестира милијарди во инфраструктура и масивни модели, Кина возвраќа со побрзи, поефикасни и сè поконкурентни решенија, објави CNBC.
