Aсоцијацијата за е-трговија на Македонија – AETM, во рамки на проектот „Поддршка на локалните бизниси со помош на е-трговија”, кој се реализира во партнерство со компанијата Виса (Visa), објавува јавен повик насловен „Е-трговија: Супермоќ за локалните бизниси”.
Јавниот повик е отворен за сите микро, мали и средни компании, кои сè уште не ги продаваат своите производи или услуги онлајн, а имаат потреба од отворање на е-продавница и од зголемување на знаењата и вештините поврзани со е-трговија. Преку јавниот повик ќе се доделуваат вредносни пакети од 1.000 евра за отворање на дополнителен продажен канал – е-продавница во рамки на постоечка платформа и нејзина маркетинг промоција и ќе се обучуваат бизнисите за зајакнување на вештините поврзани со е-трговија и дигитален маркетинг.
Идејата зад проектот е да им се помогне на компаниите да отворат дополнителен продажен канал – е-продавница со цел добивање на нови клиенти и зголемени продажби, како и да им помогне за унапредување на работата, преку зајакнување на нивните дигитални вештини, кои ќе им помогнат подобро да се претстават во јавноста и да ги реализираат своите бизнис цели.
Проектот ќе трае до крајот на мај 2023 година, а ќе се состои од поврзување на бизнисите со домашните маркетплејс платформи и отворање на нивна е-продавница во рамки на една од платформите која бизнисите сами ќе ја изберат. Одбраните кандидати ќе имаат можност да присуствуваат и на практичен едукативен семинар за е-трговија „Сѐ за е-трговија“, кој ќе се одвива со физичко присуство. Ќе бидат поддржани 15 компании за отворање и промовирањe на нивната е-продавница, а едукативниот семинар ќе можат да го посетат по најмногу двајца претставници од секоја компанија. По завршување на програмата сите учесници ќе добијат сертификати за учество
„Асоцијацијата за е-трговија на Македонија и со оваа иницијатива се вклучува во напорите за зајакнување на конкурентноста на микро, малите и средни компании и за мотивирање на бизнисите за унапредување на нивното работење, преку вклучување во е-трговијата, како нивен дополнителен продажен канал и зголемување на дигиталните вештини поврзани со е-трговија. Оваа иницијатива се реализира во соработка со компанијата Виса и претставува почетна точка на нашата нова заедничка соработка“, изјави претседателката на АЕТМ Нина Ангеловска.
„Претприемништвото е најголемата сила на секоја економија, особено на тие во развој. Со цел да ги зајакнеме малите и средни бизниси и да ги направиме поконкурентни на пазарот, сакаме заедно со нашите партнери од Асоцијацијата за е-трговија на Македонија да им помогнеме да иницираат онлајн продажба и да се вклучат во тековите на дигиталната економија, која има голем потенцијал за раст и развој на нивниот бизнис”, додаде Владимир Ѓорѓевиќ, генерален директор на Виса за Југоисточна Европа.
Аплицирањето на Јавниот повик, кое што е бесплатно, се одвива онлајн на веб страницата на АЕТМ и трае до петок, 15 март, по што ќе следи евалуацијата на апликациите од страна на комисија составена од експерти во областа.
