Израелската војска соопшти дека денес извршила воздушни напади на јеменското пристаниште Худаида, еден ден откако јеменските хути испукаа ракета која падна во близина на главниот аеродром Бен Гурион кај Тел Авив.
Војската во соопштението наведе дека нападнала „терористички цели“ на хутите во Худаида и нејзината околина.
„Нападот е извршен како одговор на повторените напади кои терористичкиот режим на хутите ги спроведува против Израел во кои ракети земја-земја и беспилотни летала се лансирани на територијата на државата“, се наведува.
Израелскиот премиер Бенјамин Нетанјаху вети одмазда за неделниот ракетен напад, прв кој ја проби израелската воздушна одбрана од нападите во март.
Хутите, кои владеат со Јемен, ги гаѓаат Израел и западните бродови во Црвено Море од почетокот на војната на Израел во Газа, во знак на солидарност со Палестинците.
