Државниот јавен обвинител не гледа никакви пречки истрагата за пожарот во Кочани во кој загинаа 62 лица да не заврши до 17 јуни, и како што налага законскиот рок од три месеци. Без да открива детали, обвинителот рече дека истрагата се наоѓа во многу важна фаза и моментално се испрашуваат сведоци и во Кочани, но и во Скопје. Според Коцевски, нема никаква селективност во истрагата. Тој и денеска повтори, како претходно изјави за Алсат дека истрагата може да се прошири и со нови осомничени лица.
„Во моментов се сослушуваат сведоци, се сослушуваат оштетени и други лица кои знаат нешто за настанот. Во меѓувреме се координираат и со вештите лица, во однос на она што треба да се вештачи. Значи нема никаква селективност досега, нема да има ни натаму. Јас веќе кажав за еден медиум, значи се до завршување на истрагата можно е и евентуално проширување, меѓутоа, тоа зависи од доказите и од она што јавните обвинители ќе го обезбедат“, рече обвинителот Коцевски.
Пред трагедијата во Кочани власта започна процедура за смена на Коцевски која сега е во мирување. Дали ќе продолжи оваа постапка или не, за Коцевски тоа е политичка одлука.
„Истово го кажав неколку пати, значи тоа е политичка одлука. Во моментов од почнување на постапката немам никакви притисоци ниту пак некакви закани во тој дел“, додаде Коцевски.
Истрагата во Кочани започна веднаш по трагедијата, на 17 март, а обвинителството има три месеци да го подготви обвинението. Вкупно 13 обвинители работат на истрагата која досега неколку пати беше проширена, а во која досега има обвинение против 68 физички и три правни лица.
