Вулканот на планината Левотоби во Индонезија исфрли „високи столбови врела пепел“, неколку дена по големата ерупција загинаа девет, а повредени се десетици луѓе.
Активноста на вулканот на островот Флорес се интензивира по првичната ерупција во понеделникот.
Властите во четвртокот ја проширија опасната зона бидејќи вулканот повторно еруптираше.
Во петокот вулканот исфрли голема количина пепел висока околу 10 километри, изјави Хади Виџаја, раководител на Центарот за вулканологија и ублажување на геолошки катастрофи.
Виџаја додаде дека лава и камења паднале во радиус од околу 8 километри од кратерот.
Нема пријавени жртви во последната ерупција, соопшти агенцијата за следење на вулканите.
Властите прогласија состојба на готовност и ја проширија опасната зона во радиус од 8 километри на северозападната и југозападната страна на вулканот.
Властите ги предупредија илјадниците луѓе кои ја напуштија областа да не се враќаат дома, бидејќи владата планира да евакуира околу 16.000 жители.
Серија ерупции во текот на неделата веќе погодија повеќе од 10.000 луѓе во 14 села, а повеќе од половина се преселиле во импровизирани засолништа за итни случаи.
Вкупно 2.384 куќи и јавни објекти беа оштетени или се урнаа откако вулкански материјал ги погоди зградите, рече Канезиус Дидимус, шеф на локалната агенција за управување со катастрофи.
Уништен е и главниот пат што го поврзува округот Источен Флорес каде што се наоѓа планината со соседниот кварт Ларантука.
Националната агенција за управување со катастрофи објави дека жителите на најтешко погодените села ќе бидат преселени во рок од шест месеци, а секое семејство што чека да биде преселено ќе добива 32 долари месечно.
