Хрватски експерт: Ристовски не може да добие казна на „зелена маса“ за потегот на дербито (Видео)

Осијек и Динамо одиграа 1:1 во големото дерби од 25-то коло во Првата Суперспорт лига на Хрватска, а мора да се напомене дека гостите избегнаа пораз со гол во 94-та минута.

Динамо второ дерби по ред постигнува гол во самата завршница, но пред да дојде до погодокот на Куленовиќ, Стефан Ристовски беше дел од една мешаница која привлече големо внимание.

Куленовиќ и Миерез заработија жолти картони, но голема среќа имаше Ристовски што мина без никаква опомена во оваа ситуација, бидејќи поранешниот капитен му зададе удар на Дарко Нејашмиќ.

Главниот судија не го виде овој момент и истиот не беше прегледан ниту од ВАР, па во инцидентот во кој избегна црвен картон, добра вест за Ристовски е тоа што оваа ситуација не може да биде разгледувана на „зелена маса“ според правилата во Хрватска.

– Проценката на теренот беше дека потегот на Ристовски не е за црвен картон и затоа ВАР собата не смееше да реагира. Судијата не покажа ниту жолт картон. Дисциплинскиот правилник на ХНС е во склад со оние на ФИФА и УЕФА. Јавноста треба да знае дека судиските одлуки се конечни и не може да бидат променети по крајот на еден меч. Такви се правилата, – вели комесарот на хрватскиот фудбал, Јосип Брезни во интервју за „Индекс“.