“Grand Theft Auto 6” би можела да претрпи уште едно одложување на датумот на издавање, а некои развивачи на видеоигри дури и се „молат“ тоа навистина да се случи.
Кон крајот на 2024 година, се појавија бројни гласини и извештаи дека “Rockstar Games” планира да го помести излегувањето на “GTA 6” за неколку месеци. На почетокот на мај 2025 година, легендарниот развоен тим тоа и официјално го потврди — што претставуваше голем удар за нетрпеливите фанови на “Grand Theft Auto” серијалот.
Во моментов, оваа долгоочекувана игра е планирана за излегување на 26 мај 2026 година. Според достапните информации, одложувањето всушност може да биде позитивна работа за “GTA 6”, бидејќи добро информирани инсајдери тврдат дека играта би била во многу полоша состојба доколку “Rockstar” се држеше до првичниот план да ја објави за време на празничната сезона во 2025.
И покрај тоа што беше објавен вториот, долгоочекуван трејлер и откриени беа повеќе детали за главните и споредните ликови, играта сè уште не е имуна на можноста од ново одложување — бидејќи постои реална шанса нејзиното лансирање повторно да биде поместено.
Тоа го тврди Џејсон Шраер од “Bloomberg”, кој претходно точно го предвиде првото одложување на “GTA 6”, а сега вели дека е можно да дојде до уште едно.
„Нема никаква гаранција дека мај 2026 е сигурен датум“, изјави Шраер во извештај објавен на 9 мај, истакнувајќи дека и други издавачи на игри се обидуваат да избегнат временско совпаѓање со премиерата на “GTA 6”. Некои од нив, според него, дури и се „молат“ за ново одложување.
„Станува збор за огромна партија четиридимензионален шах што се игра низ целата гејминг индустрија, додека бизнис-аналитичарите во секоја голема компанија се обидуваат да предвидат дали “Rockstar” навистина ќе ја заврши играта навреме за мај 2026 — за да можат да ги испланираат сопствените потези.“
Уште едно одложување на новото издание на “Grand Theft Auto”, без сомнение, дополнително би ги фрустрирало фановите, кои и онака се незадоволни од долгото чекање на најновиот наслов на “Rockstar”.
Се споменува и можност “Rockstar” да ја пополни празнината во календарот за издавање со лансирање на порт од “GTA IV” за модерните конзоли.
