Германската железничка компанија Дојче Бан сака целосно да ги отстрани дизел горивата од своите железнички композиции и да ги замени со биогорива до 2040 година.
„Нашите 3.000 дизел возила оваа година постепено ќе се префрлаат на алтернативни горива“, рече извршниот директор на Дојче Бан, Ричард Луц.
„Покрај целосното насочување кон зелена енергија, постепеното елиминирање на дизелот до 2040 година е еден од нашите централни еколошки планови“, додаде тој, пренесува Индекс.хр.
Компанијата има намера да се потпре на биогоривата, меѓу другото, кои ќе се произведуваат од отпаден материјал, така што производството на гориво нема да влијае на производството на храна.
Што се однесува до новите возови, од Дојче Бан велат дека во иднина ќе купуваат само водородни мотори или електромотори со акумулатор.
Подружницата на Дојче Бан за превоз на товар, DB Cargo, најави слични цели во средината на јануари, вклучувајќи локомотиви кои можат да избираат помеѓу дизел и електричен погон, за да можат да работат на електрифицирани линии, но и таму каде што нема такви можности.
