Претседателката на Европската комисија, Урсула фон дер Лајен се уште не добила покана за инаугурацијата на новоизбраниот американски претседател Доналд Трамп на 20 јануари, изјави денеска нејзината портпаролка, Пола Пињо.
„Ако добие покана, ќе видиме, но во моментов нема планови (да присуствува на инаугурацијата)“ – рече Пињо.
„Блумберг“ рано утринава објави дека Фон дер Лајен се обидува да договори средба со Трамп пред инаугурацијата, а претставниците на ЕУ и помошниците на Трамп веќе разговарале, но се уште не е познато дали посетата може да се договори до 20 јануари.
Странските лидери традиционално не присуствуваат на инаугурацијата на американските претседатели од безбедносни причини, но на церемонијата ги претставуваат највисоките функционери, пренесува Ројтерс.
Кинескиот претседател Си Џинпинг, поранешниот бразилски претседател Жаир Болсонаро, израелскиот премиер Бенјамин Нетанјаху и италијанскиот премиер Џорџа Мелони добија покани, јавува Ројтерс.
Според извештаите, Си нема да присуствува на инаугурацијата на Трамп, но ќе испрати претставник на највисоко ниво.
