Завршниот турнир во Дејвис Купот ќе се одигра од 19-ти до 24-ти ноември во Малага, а иако дотогаш има уште навистина многу време, шпанските фанови на големо се израдуваа навеста која ја соопшти селекторот.
Давид Ферер ја информираше јавноста дека имал конструктивни разговори со Рафаел Надал и дека добил зелено светло да го вклучи во шпанскиот тим, што значи дека „бикот од Мајорка“ ќе брка уште една „салатара“ во својата кариера.
Надал настапи на Олимписките игри и последниот професионален настап му беше додека ги бранеше боите на својата земја, а како што стојат работите, Рафа со цело срце сака да ја претставува свсојата земја и на завршницата од Дејвис Купот.
– Со Рафа разговарав по одиграните групи во Валенсија и ми рече дека сака да биде дел од тимот доколку се пласираме на завршниот турнир. После тоа повторно зборував со него и ми рече дека многу сака да биде дел од тимот. Тој практично сам одлучи дека ќе игра во Малага, – изјави Ферер.
До турнирот во Малага има уште два месеци, а покрај Надал, шпанскиот селектор ги пријави уште Алкарас, Баутиста Агут, Карењо Буста и Гранолјерс.
