Веројатно веќе сте запознаени со циркулаторниот систем на вашето тело – мрежата на крвни садови, артерии и вени кои носат црвени крвни зрнца и кислород до секој дел од вашето тело.
Лимфниот систем е вториот циркулаторен систем на ‘рбетниците, покрај крвоносниот. За разлика од него, лимфниот систем е од отворен тип. Овој органски систем има дренажна улога. Се состои од лимфни садови,лимфни јазли и лимфоидни органи низ кои постојано циркулира лимфата. Експертите објаснуваат како стресот влијае на лимфните јазли.
Дали стресот може да предизвика отечени лимфни јазли?
„Стресот директно не предизвикува отечени лимфни јазли“, вели д-р Самуел Матис, лекар за семејна медицина.
Тој верува дека стресот може да доведе до отекување на лимфните јазли со тоа што влијае на имунолошкиот систем, а д-р Фредерик Бертли, имунолог, додава дека кога доживуваме стрес, нашето тело го ослободува хормонот кортизол.
Првично, кортизолот го зајакнува имунолошкиот систем, подобрувајќи ја неговата способност да се бори против болести. Но, ако стресот продолжи, високите нивоа на кортизол може да го ослабат имунолошкиот систем, зголемувајќи го ризикот од инфекции кои водат до отечени лимфни јазли.
Колку долго лимфните јазли можат да останат отечени?
„Отекувањето на лимфните јазли опстојува сè додека постои имунолошка активност“, објаснува д-р Бертли.
Нехроничните бактериски инфекции исчезнуваат побрзо од вирусните, обично во рок од една до три недели.
Д-р Матис додава дека отечените лимфни јазли кои не се осетливи или се намалуваат во текот на неколку недели генерално не се причина за загриженост и обично не се поврзани со сериозна состојба. Меѓутоа, ако вашите лимфни јазли останат отечени повеќе од четири недели, би било добра идеја да ги прегледате кај вашиот лекар, пренесува „Хелти“.
Што значи кога лимфните јазли се отечени?
Во принцип, отечените лимфни јазли укажуваат на тоа дека вашиот имунолошки систем е активен и ја врши својата работа.
„Кога тие отекуваат, тоа е добар показател дека човечкото тело развива имунолошки одговор и е подготвено да се бори против патогените и да го поправи секое оштетено ткиво“, вели д-р Бертли.
Меѓутоа, експертите велат дека ако отокот продолжи, тоа може да сигнализира подлабок проблем. Во такви случаи, мудро е да се побара совет од лекар.
