Воздухопловот „Ер Трактор“ (Air Tractor AT-802A Fire Boss – Z3-BGV), кој е дел од флотата на Дирекцијата за заштита и спасување (ДЗС) и се користи за гаснење пожари, денеска е вратен на меѓународниот аеродром „Скопје“ по успешно завршената годишна инспекција и сервисирање.
Од ДЗС информираат дека сервисот е извршен во согласност со Техничката спецификација во рамки на договорот, како и во согласност со дополнителните и/или нерутински задачи и услуги предвидени од страна на овластена организација за одржување воздухоплови според стандардите на Европската агенција за безбедност во воздухопловството (EASA Part-145).
„Годишната инспекција е завршена навремено, во рамки на предвидениот рок од 60 дена, согласно Договорот за поправка и сервисирање на воздухоплови и резервни делови“, велат од Дирекцијата.
Со враќањето на авионот, противпожарните капацитети на државата се целосно подготвени за летната сезона и можните пожари.
