Резултатите од продажбата за 2024-та година полека доаѓаат, а вестите во никој случај не се добри за „Ford Mustang“. Иконскиот американски автомобил привлече само 44.003 купувачи во минатата година, што ја прави 2024-та година официјално најлошата за продажба на „Mustang“ во неговата 60-годишна историја.
Продажбата падна толку многу што електричниот „Mustang Mach-E“, на кој традиционалните љубители на „Mustang“ гледаат со презир, го надмина класичниот модел за над 7.000 единици.
Ова не е исклучок – продажбата на „Mustang“ опаѓа со години, со исклучок на 2023-та година кога бројките благо се зголемија. Претходната најлоша година беше 2022-ра година, кога беа продадени 47.566 единици.
Подетална анализа на овогодинешните резултати открива силен пад на крајот на годината, од 43,4% во последниот квартал во однос на истиот период во 2023-та година. Во тој период се продадени само 7.518 автомобили.
Електричниот „Mach-E“ е успех
Додека класичниот бензински „Mustang“ бележи пад, „Mach-E“ постигнува одлични резултати. Продажбата на електричниот модел достигна 51.745 единици во 2024-та година, поттикната од силниот четврти квартал во кој беа продадени 16.119 возила, што претставува зголемување од 35,6% во споредба со минатата година.
„Ford“ излезе на пазарот со поволни цени и стимулации за „Mach-E“ во изминатите 12 месеци, со цел да се спротивстави на слабата побарувачка за електрични возила.
Почетната цена за „Mach-E 2025“ година започнува од 38.490 долари за моделот „Select“ со погон на задните тркала.
Во меѓувреме, класичниот „Mustang EcoBoost“ од 2025-та година ја задржа почетната цена од 33.515 долари како минатата година. Сепак, цената на моделот „GT“ е зголемена за 2.600 долари, со почетна цена од 47.055 долари за најевтината верзија.
