Запрена е постапката по пријавата за незаконска исплата на трошоци за патување во странство на сопругата на претседателот на Собранието, Африм Гаши. По овој предмет постапуваше Државната комисија за спречување на корупцијата (ДКСК). Антикорупционерот Сервет Демири на денешната (21 февруари) седница, рече дека не се потврдени и утврдени повреди на одредби од законот за спречување на корупција и судир на интереси.
Пријавата која ДКСК ја разгледуваше се однесува на покривање на трошоци за патување реализирано во период од 8 јули до 11 јули 2024 година на парламентарниот самит на НАТО во Вашингтон (САД).
Демири побара да се достави препорака за доуредување на упатството на собранието кое ги регулира службените патувања со одредби по примерот на Кодексот на Владата за етичко однесување. Комисијата утврди дека актуелното Упатство за реализирање на службени патувања во странство, содржи правна празнина и недореченост.
“Утврдено е дека сопругата на претседателот патувала во странство, како дел од делегацијата, врз основа на решение донесено од секретарот на собранието. Анализата покажа дека трошоците се покриени од буџетот на собранието и дека постоела програма за брачните партнери и дека тоа е вообичаено при вакви настани“, рече Демири.
Според него, за носителите на оваа функција треба да се применуваат истите стандарди како и за премиерот како носители на највисока функција на извршната власт кои се содржани во Кодексот за етичко однесување.
Во него предвидено е, и дозволено со државни средства да бидат покриени трошоците за брачниот другар или другарка кога патуваат како дел од официјална делегација.
ДКСК утврди дека нема основ за натамошно постапување во случајот.
