Во Фејсбук групата „Travel to Macedonia“ (Патувај во Македонија), беше споделена анонимна објава на англиски јазик од член во групата, во кои таа го раскажува искуството со расизмот во Македонија.
Авторката на објавата се претстави како Азијка, која е во брак со Македонец, и која живеела тука во Македонија речиси една година.
„Генерално, луѓето овде се многу љубезни и мили – особено постарите луѓе. Но, не разбирам зошто многу млади луѓе, особено оние под 20 години, се однесуваат на расистички, груб и непочитувачки начин. Кога одам по улица, тие често ми викаат, нарекувајќи ме „Кина“, „Јапонска“ или викајќи кинески поздрави како „Нихао“ или јапонски поздрави како „Коничива“. Непочитувајќи, тие претпоставуваат дека секој Азиец е Кинез или Јапонец. Азија е огромен континент со многу земји. Кога ќе видите Азиец, тој може да биде од Сингапур, Малезија, Тајланд, Филипини, Индонезија и многу други“, објаснува за искуството оваа Азијка.
Замислете, вели, да одите по улица и некој случајно ви вика: „Албанец!“ или „Турчин!“ Не е ли тоа смешно? Ако вашиот одговор е да, тогаш разбирате како се чувствувам, додава таа.
„Непристојно е и незнаечко е да викате „Кинез“ или „Јапонец“ на странец. Ако сте навистина љубопитни, едноставно можете учтиво да прашате: „Извинете, дали живеете овде во Македонија? Од каде сте?“ Повеќето Азијци ќе одговорат љубезно кога ќе им пристапите со почит. Да бидеме искрени, мнозинството луѓе овде се љубезни, топли и великодушни – особено луѓето на средна и постара возраст. Но, многу млади луѓе се однесуваат катастрофално: груби, необразовани и непочитувачки“, раскажува за впечатокот Азијката.
Како заклучок, до младите луѓе во Македонија таа ги замоли да се обидат се да се едуцираат за различноста во светот.
„Не бидете расисти и не се шегувајте за нечија етничка припадност. И до сите родители: ве молам научете ги вашите деца да ги почитуваат другите, без разлика од каде доаѓаат или како изгледаат“, порача таа во објавата.
