Претседателот на Собранието – Африм Гаши денеска по повод празникот 28 Август – Успение на Пресвета Богородица упати честитка до сите православните христијани во земјава.
– Дозволете ми да ви го честитам големиот православен христијански празник Успение на Пресвета Богородица. Нека празникот ви донесе среќа, здравје и многу радости во вашите семејства. Овие празници се убав момент да се потсетиме колку нашите заемни традиции на почитување на верските празници и обичаи се дел од колективното памтење на нашите граѓани. Нека ваквите празници нè потсетуваат дека секогаш сме стоеле и ќе стоиме во иднина едни покрај други и едни заедно со други – се вели во честитката.
Живееме во времиња во кои, како што наведува, мораме постојано да се потсетуваме на традициите кои ни ги пренесуваат нашите родители.
– Мораме да се потсетуваме за да не заборавиме дека скромноста, искреноста, чесноста и топлината помеѓу луѓето, без разлика на нивната припадност, е составен дел на нашата историја. Тоа сите треба да се трудиме да биде составен дел и од нашата иднина. Нека ви е честит празникот Успение на Пресвета Богородица – се вели во честитката на Гаши.
