Хроника

Две лица нападнале и ограбиле турски државјанин вчера на бензинска станица на автопатот Табановце – Куманово, соопшти денеска СВР Куманово. Разбојништвото во кумановската полиција го пријавил 22-годишниот турски државјанин М.Ш.К, синоќа во 20 часот.

Две непознати лица, вчера во 17 часот, на автопатот Табановце – Куманово во близина на бензинската станица, физички го нападнале и му одзеле ранец во кој имало пари и лични документи по што побегнале, се наведува во соопштението од СВР Куманово.

Полицијата презема мерки за пронаоѓање на сторителите и расчистување на случајот.

Скопје, 4 јули- Против 47-годишен скопјанец е поднесена кривична пријава поради основано сомнение дека сторил кривично дело „неовластено производство и пуштање во промет наркотични дроги, психотропни супстанци и прекузори“.

Министерството за внатрешни работи денеска соопшти дека во вторникот со судска наредба извршен е претрес во неговиот дом на улицата „Јајце“, каде се пронајдени хероин, мешавина од земја и хеорин, мешавина од парацетамол и кофеин и дигитална вага со остатоци од хероин.

Четириесет и седумгодишниот С.К. е приведен и задржан во полициската станица Бит Пазар.

Скопје, 4 јули– Две лица се здобиле со тешки телесни повреди во две од вкупно осум сообраќајки во текот на вчерашниот ден. Во три сообраќајки со полесни повреди се здобиле три лица, а во три била причинета материјална штета.

Од СВР Скопје информираат дека вчера сообраќајната полиција санкционирала 58 возачи кои се движеле со брзина поголема од дозволената, тројца возачи поминале на крстосница на црвено светло, а двајца возачи не дале првенство на минување на обележан пешачки премин.

Еден возач е санкциониран за неправилно престигнување, 14 возачи за не носење заштитен шлем, пет возачи за не  користење сигурносен појас и 17 возачи кои користеле мобилен телефон за време на управување на моторно возило.

Од сообраќај биле исклучени 18 нерегистрирани возила.

Затекнати биле 78 возила непрописно паркирани, а со помош на  специјалното возило „пајак”, отстранети биле 70 возила.

Гостивар, 3 јули– Основното јавно обвинителство Гостивар донесе Наредба за спроведување истражна постапка против едно лице поради постоење основано сомнение дека сторило кривично дело – Убиство од член 123 став 1 во врска со член 19 од Кривичниот законик.

Обидот за убиство за кој обвинителството ја поведе постапката се случил на 2-ри јули околу 4:30 часот во угостителски објект во село Неготино, полошко.

Осомничената, вработена во угостителскиот објект, пред да го изврши делото била вознемирувана од страна на оштетениот – нејзин колега.

Откако и по нејзините повици да престане, оштетениот продолжил со дејствијата, таа се упатила кон шанкот, зела нож и му нанела неколку убодни рани во пределот на стомакот.

Ценејќи дека се исполнети законските одредби, надлежниот јавен обвинител до судија на претходна постапка од Основниот суд Гостивар достави предлог за определување на мерката притвор за осомничената.

Предлогот беше прифатен и на осомничената судот и определи притвор во траење од 30 дена.

Интегрален текст од соопштение на Основното јавно обвинителство/kurir.mk

Неготино, 3 јули- 62-годишен маж загина откако се превртел со трактор. Како што информира полицијата, вчера во 11:30 часот било пријавено дека на локалниот пат за село Корешница, Демиркаписко, Е.Е.(62) од с.Корешница, управувајќи трактор без регистарски ознаки, изгубил контрола и се превртел.

Тој починал на местото на настанот. Извршен бил увид од Јавен обвинител и увидна екипа од Полициската станица Неготино.

Скопје, 3 јули- Вчера во 11:00 часот во СВР Скопје, од Комплексот клиники „Мајка Тереза“ било пријавено дека со тешки телесни повреди кај нив бил донесен С.Р.(33) од селото Св.Петка, Скопско.

Според пријавеното, тој се здобил со повреди во трговски центар додека извршувал градежни работи на деловен објект. Се работи на расчистување на случајот.

Скопје, 2 јули- Момче било пронајдено починато во стан во населбата Аеродром, информираше МВР.

-На 01.07.2019 година во 18.38 часот во СВР Скопје било пријавено дека во стан на булевар АВНОЈ во Скопје пронајден е починат Н.Ѓ.(38). Од лекар од Итна медицинска помош констатирана е смрт без траги на насилство. Увид на местото извршиле Јавен обвинител и екипа од Полициската станица Аеродром. По наредба на Јавен обвинител телото е предадено на обдукција, велат од МВР.

Гостивар, 2 јули- На 02.07.2019 година околу 06.05 часот во Полициската станица Гостивар, од Ургентен центар Гостивар било пријавено дека кај нив со повреди од остар предмет бил донесен Ш.Ј.(42).

По преземени мерки било констатирано дека тој бил повреден од страна на Р.Н. во угостителски објект во село Неготино, гостиварско.

Жената била приведена и задржана во полициска станица, а по целосно документирање на случајот против неа ќе биде поднесена соодветна пријава.

Скопје, 1 јули- Во стан во скопската населба Кисела Вода, викендов бил пронајден починат маж.

Во скопската полиција од Итна медицинска помош било пријавено дека во стан на улица „Пушкинова“ во Скопје има починато лице без видливи траги на насилство, а потоа се утврдило дека се работи за 41-годишниот Н.А. од Скопје.

Увид на местото извршила екипа од СВР Скопје.

По наредба на Јавен обвинител телото на починатиот било предадено за обдукција, а таа ќе ги даде сите детали околу тоа како настапила смртта.

Струмица. , 1 јули– Триесетгодишен моторциклист загинал во сообраќајка на патот Богданци-Стојаково, велат од СВР Струмица.

– Вчера во 22.50 часот било пријавено дека на раскрсницата со локалниот пат Богданци-село Стојаково, се случила сообраќајна незгода помеѓу моторцикл „баотиан 125“ без регистарски ознаки, управуван од Ѓ.В.(30) од село Стојаково, и товарно моторно возило „мерцедес актрос“ со гевгелиски регистарски ознаки, управувано од С.Б.(42) од Валандово. Во незгодата на местото на настанот починал Ѓ.В – велат оттаму.

Извршен бил увид од јавен обвинител и увидна екипа од Полициската станица Гевгелија. По наредба на јавен обвинител телото на починатиот било предадено во институтот за судска медицина во Скопје за обдукција.