Спорт

„Спорт Медиасет“ пишува дека Удинезе и Илија Несторовски си подале рака, наскоро Македонецот ќе биде презентиран како ново засилување.

Италијанскиот медиум тврди дека трансферот на Несторовски во Удинезе е завршена работа, во наредните денови тој треба да ги помине медицинските тестови, да стави потпис на договорот и да биде презентиран.

„Спорт Медиасет“ ги објавува деталите, Несторовски ќе потпише тригодишен договор и ќе го носи дресот со број 30, кој го имаше и во Палермо.

Несторовски во Удинезе оди како слободен фудбалер поради исфрлувањето на Палермо во Серија Д.

По состанокот на челниците на Реал Мадрид со Зинедин Зидан конечно е позната насоката кон која ќе се движи Реал Мадрид до крајот на предниот рок.

Јасно е дека Хамес Родригез ќе го напушти клубот, и најверојатно по негова желба ќе се пресели во Атлетико Мадрид. Кога е збор за Иско и Асенсио за нив се чекаат понуди, додека Себаљос оди на позајмица во Арсенал.

И, она клучното… Иако цело лето се зборува за заминување на Герет Бејл, тој на подготовките покажа дека може да биде од корист за тимот и го промени размислувањето на Зинедин Зидан кој сега побарал да остане во клубот.

Веќе е најавено и доаѓањето на фудбалерот на Ајакс, Ван де Бек зад кого е извонреднa сезона.

Менаџерот на Ливерпул, Јирген Клоп ги предупреди навивачите да не очекуваат спектакуларни трансфери во текот на летото. Во последните години тој потроши околу половина милијарда фунти за својот состав и тоа му донесе освојување на Лигата на Шампионите минатата сезона.

Но Германецот откри дека не може да си дозволи да фрла повторно пари и истакна дека такво нешто може да си дозволат само два клуба – Манчестер Сити и ПСЖ. Во нивно друштво, но со мали отстапки, ги додаде шпанските гиганти Барселона и Реал Мадрид.

– Ние сме прилично спокојни на трансфер пазарот и така ќе биде. Како што реков претходно, тоа нема да е најголемиот трансфер прозорец на Ливерпул. Во последните две години инвестиравме многу во тимот, не може да е така секоја година. Луѓето мислат дека туку така можеме да даваме по 200-300 милиони секоја година. Има само два тима кои можат да го прават тоа – Манчестер Сити и ПСЖ. Како што изгледа, истото го можат и Реал Мадрид и Барселона, но не до таа мера. Јас сум многу среќен со тимот со кој располагам. Имам потреба од засилување само на една позиција, но не е задолжително да потпишуваме со играч за неа, рече Клоп.

Досега тој го засили Ливерпул единствено со холандскиот тинејџер Сеп ван ден Берг од Цволе, а наскоро се очекува да биде објавено и привлекувањето на младиот Харви Елиот од Фулам.

Атлетико Мадрид вечерва на јавноста и го претстави англискиот репрезентативец Киран Трипије. Десниот бек досега играше за Тотенхема, а за неговиот трансфер „јорганџиите“ издвоија 22 милиони евра.

Трипие кариерата ја започнал во Барнли, а во Тотенхем играше од 2015 година. Во клубот од Лондон стекна целосна афирмација и стана стандарден член на англиската репрезентација.

За место во тимот Трипие ќе се бори со Колумбиецот Сантијаго Аријас.

Атлетико во овој преоден рок ја префрли сумата од 200 милиони евра за трансферите на Жоао Феликс, Маркос Љоренте, Ренан Лоди, Фелипе, Иван Шапоњиќ и сега Трипие додека Ектор Ерера го донесоа како слободен играч.

Аргентинскиот напаѓач Мауро Икарди им дал ултиматум на челниците на Јувентус дека имаат време до 10 август да остварат трансфер или тој ќе замине во некој друг клуб.

Според италијанските медиуми, Икарди е подготвен да ја почека Старата дама да реши речиси до почетокот на сезоната, но им даде и рок до кога треба да се реализира неговото доаѓање во Торино.

Доколку Јувентус се откаже од намерата да го донесат Аргентинецот во нивните редови, Икарди има и друга опција, а тоа е да го облече дресот на Наполи.

Моментално поранешниот капитен на Интер тренира сам откако тренерот Антонио Конте го отстрани од подготовките и се обидува да ја задржи формата додека не најде нов клуб.

Инаку, Интер постави цена од 80 милиони евра за Икарди, додека Јувентус е подготвен да плати околу 60 милиони евра. Исто така, во игра влегува и Наполи на кого екипата од Милано ќе му го понуди Аргентинецот за 70 милиони евра на крајот од преодниот доколку веќе нема други опции за него.

Дури и во добро подмачкана машина како Манчестер Сити има некои детали што кочат. Таков е случајот со една од ѕвездите на тимот, Лерој Сане, кој цела година не може да се разбере со раководството и не потпишува нов договор.

Неговиот сегашен договор е за уште две години, а Баерн Минхен е заинтересиран за него. Играчот му признал на менаџерот Џозеп Гвардиола дека не е среќен на „Етихад“, пишува весникот „Сан“. И тоа ја отвора вратата за трансфер во неговата татковина.

– Очекувам Лерој да остане кај нас. Но има и друго. Клубот му упати понуда пред околу една година, а јас секогаш сум велел дека сакам да располагам само со играчи кои се среќни тука. Тој знае дека сите во клубот ќе сториме се што е во наша моќ да му помогнеме да биде најдобрата верзија на самиот себе. Тоа нема да значи дека местото му е загарантирано, бидејќи располагам со многу квалитетен состав. Желбата да располагам со него во составот постои. Но, во исто време сакам секој мој играч да биде среќен. Ако тој не е среќен тука, тој може да замине, нема да го спречам, рече Гвардиола.

Овие зборови ја отвораат вратата за трансфер во Баерн. Баварците сепак не сакаат да плаќаат трансферна сума од 100 милиони евра, која се бара за потписот на Сане. Во исто време „граѓаните“ не се подготвени да отстапат од неа, па Германците ќе треба да посегнат длабоко, ако сакаат да располагаат со него.

Таткото на Нејмар е во Торино за средба со спортскиот директор на Јувентус, Фабио Паратичи, вели „Ел Мундо Депортиво“, повикувајќи се на информации од Италија.

Веста доаѓа во денот, кога целото внимание на навивачите беше приковано на трансферот на Матаис Де Лихт од Ајакс во Јувентус за 75 милиони евра.

Според публикацијата средбата ќе има информативен карактер, а до овој момент не се водени конкретни разговори за привлекувањето на Нејмар од шампионите на Италија во последните осум години.

Бразилецот е пред напуштање на Пари Сен Жермен, а за неговата желба тренерот Томас Тухел изјави дека знае од крајот на сезоната во Лига 1. Барселона се обидува да го врати Нејмар во своите редови, но засега преговорите со ПСЖ не се напредни.

Фановите на Јувентус не се воодушевени од информациите. Многумина веруваат дека тоа е лажна вест, а според други Бразилецот едноставно не е потребен на „Старата Дама“.

Каталонски „Спорт“ објави разговор со неименувам човек од стручниот штаб на Барселона кој објасни зошто клубот го препуштил Де Лихт на Јувентус.

Откако Барселона во текот на летото го договори Френки Де Јонг од Ајакс за 75 милиони евра се очекуваше нешто слично да се случи и со Матијас Де Лихт.

Де Лихт навистина бил на радарот на Барселона, но Каталонците се откажале.

Изворот на „Спорт“ тврди дека во Барселона го следела Де Лихт, меѓутоа се откажала затоа што не виделе доволно потенцијал во него!?

„Де Јонг го следевме две години, секоја недела. Се убедивме дека тоа играч со посебен талент и мета кон која треба сериозно да се насочиме. Гледајќи го сега во Барселона после само два тренинзи можам да потврдам дека е импресивен играч. Едноставно тој е играч каков што нема друг на пазарот“.

Де Лихт?

„Де Лихт ни се допаѓаше и исто така го следевме, тоа воопшто не е тајна, но убедени сме дека неговата цена требаше да биде пониска. Како поради позиција на која игра така и поради неговиот потенцијал“, зборувал човекот од таборот на Барселона.

Ова звучи навистина чудно затоа што за Де Лихт во овој момент многумина ќе кажат дека е фудбалерот од кој најмногу се очекува во иднина, барем кога се стоперите во прашање.

купи утревечер го пречекува Пјуник во реванш меч од првото квалификациско коло во Лигата на Европа со надеж дека може да се пласира во следната рунда. Има позитивни 3-3 од првиот меч во Ереван

„Нема да калкулираме и да играме на 0-0. На првиот натпревар имавме 3:1, потоа шанси за 4:1, но заврши 3:3. Направивме грешки на крајот, а тоа во Европа не се простува. Знаеме дека не очекува тежок натпревар. Пјуник е квалитетен тим, но ние имаме добар резултат од првиот меч и не се плашиме. Ќе играме дома, пред нашите навивачи и сакаме победа“, изјави Умит Каран, тренерот на Шкупи.

Капитенот Муарем Бајрами вели дека Шкупи сега го очекува потежок меч, од гостувањето во Ерменија.

„Ќе биде двојно потешко утре. Имаме добар резултат, но ќе треба да одиграме уште подобро на утрешниот реванш. Сакам да ги израдуваме „Шверцерите“ и да се пласираме понатаму во Лигата на Европа. Пјуник е добар тим, нашите тимови имат негативна традиција со овој ерменски клуб, но време е да ја прекинеме. Со поддршка од навивачите, кои се наше најсилно оружје, можеме до успех“, изјави Бајрами.

Како што се очекуваше, Стив Брус официјално беше назначен за главен тренер на Њукасл со 3-годишен договор. Сопственикот Мајк Ешли плати 4 милиони фунти на Шефилд Венздеј за неговите услуги.

Заедно со 58-годишниот стратег, кој исто така е фан на клубот и роден во Тајнсајд, ќе работат неговите долгогодишни асистенти Стив Агну и Стивен Клеменс.

– Јас сум среќен и многу горд што сум во можност да бидам главен тренер на Њукасл Јунајтед. Ова е клубот што го поддржувам од дете, исто така клуб на мојот татко, така што она што се случува е многу посебен момент за мене и за моето семејство. Очекуваме сериозен предизвик, но јас и мојот тим сме подготвени за тоа. Ние ќе ги засукаме нашите ракави и ќе се потрудиме да направиме навивачите да се гордеат со тимот, додаде тој.

Брус и неговиот тим веќе пристигнаа во Кина, каде што денес Њукасл игра против Вулверхемптон на Купот на Премиер лигата во Азија. Тие ќе го предводат тимот во сабота на вториот натпревар против Манчестер Сити или Вест Хем на турнирот.