Економија

НЛБ Банка, како иновативна и современа банка која е во чекор со светските трендови, ја прошири својата понуда со уште еден канал за комуникација и од денес е достапна на Вибер. Истовремено, Банката го промовираше и првиот банкарски електронски асистент – НЕЛА која е на располагање 24/7 и е подготвена да одговори на сите прашања поврзани со производите и услугите. Како иновативни предводници кои ги следат новите трендови и технологии, овој пионерски чекор на НЛБ Банка, има за цел да ја промени сликата на секојдневната комуникација на релација банка – клиент.

„Со цел подобрување на корисничкото искуство, континуирано вложуваме во надградување и подобрување на услугата и достапноста, како и градење и одржување на отворена и блиска комуникација со нашите клиенти. Воведувањето на оваа корисна, и би рекле, забавна комуникациска алатка беше само еден логичен тек на работите за нас во НЛБ Банка. Свесни за потребите и барањата на нашите клиенти, модерниот начин на комуникација и широката употреба на Вибер апликацијата, први на пазарот, го лансиравме Вибер chat bot-от преку кој нашите клиенти ќе комуницираат со НЛБ Електронскиот Асистент – НЕЛА. Таа ќе биде достапна за сите прашања и потреби на нашите клиенти, ќе им помогне лесно да ја пронајдат најблиската експозитура или банкомат, да добијат помош при избор на соодветен кредит или картичка, да закажат состанок, да аплицираат онлајн за кредитен продукт и воопшто да добијат брза и безбедна поддршка. Затоа, Ве охрабруваме да станете и Вие дел од нашата Вибер заедница и да се уверите во нејзините придобивки“, изјави Антонио Аргир, Претседател на Управниот Одбор на НЛБ Банка.

За да ја запознаете НЕЛА и да се вклучите во оваа возбудлива двонасочна комуникација потребно е да се регистрирате на Вибер ChatBot-от кој e достапен на следниот линк: viber://pa/?chatURI=nlbbankaskopje. За уште позабавно корисничко искуство преземете ги специјално креираните НЕЛА стикери достапни на линкот: https://stickers.viber.com/pages/nlbbankaskopje?redir=1

Со оваа нова понуда НЛБ Банка уште еднаш го потврди имиџот на современа банка која се грижи за подобра услуга, поголемо корисничко задоволство и градење на блиски релации со клиентите. Банката и во иднина ќе продолжи да ги следи светските трендови во банкарството и технологијата во насока на поголема дигитализација, унапредување на банкарските процеси и креирање на персонализирана понуда со што на своите клиенти, им дава широк избор за извршување на финансиските услуги како преку современите така и преку традиционалните канали за продажба.

Секој што има најмалку 15 години, лична карта или пасош и транскациска сметка на негово име ќе треба да се регистрира во електронскиот систем на УЈП и на својот мобилен телефон да ја инсталира апликацијата „Мој ДДВ“ за да бара од државата поврат на парите од данокот.

Апликацијата ќе биде достапна за симнување на веб страницата на УЈП од 1 јули, а на еден телефон ќе можат да бидат логирани повеќе лица. Повратот ќе се прави преку скенирање на баркодовите на фискалните сметки кои автоматски ќе се испраќаат во УЈП. Нема потреба тие да се чуваат. Фискалните сметки не треба да бидат постари од 10 дена, а повратот ќе важи само за сметки до 30.000 денари, за да се избегнат скапи односно луксузни работи, велат од Владата. Повратот нема да се прави за фактури и сметки со кои граѓаните плаќаат струја, вода и останатите комуналии.

Државата ќе враќа 15% од платениот ДДВ. Што значи дека на платена сметка од 1000 денари, граѓаните плаќаат 180 денари ДДВ. Од овие 180 денари државата ќе врати 15% или во овој случај 27 денари.

Едно лице месечно може да врати максимум 600 денари за кои треба да потроши над 22 илјади денари.

За парите кои ќе се добијат како поврат на ДДВ нема да плаќа персонален данок.

Првата исплата ќе биде во декември 2019 година директно на сметките на граѓаните, а потоа на секои три месеци, односно во февруари, мај, август и ноември. Во буџетот за враќање на ДДВ е проектирано да бидат вратени најмногу 50 милиони евра годишно.

Од денеска со недела земјава е домаќин на Состанокот на Конституенцата на Меѓународниот монетарен фонд (ММФ) и Групацијата на Светска банка (СБ) во која членува нашата земја. Организатори на состанокот се Министерството за финансии и Народната банка, на кој ќе учествуваат меѓународни експерти кои ќе дискутираат за клучни економски теми.

Состанок претставува значајна можност да ја потврдиме подготвеноста да бидеме носители на настани што се на високо експертско ниво. Средбите на Конституенцата претставуваат своевиден форум на кој високите претставници на носителите на фискалната и монетарната политика во земјите членки на Конституенцата разменуваат мислења за економските политики и програмите на ММФ и СБ, како и за други клучни прашања за европската и светската економија, сметаат организаторите.

На Состанокот на Конституенцата ќе учествуваат директорот на Одделот за фискални работи во ММФ, Виктор Гашпар, директорот на Одделот на ММФ за Европа, Пол Томсен, потпретседателите на Групацијата на СБ за Европа и Централна Азија, Сирил Милер и за човечки капитал, Анет Диксон и потпретседателката на ИФЦ за Латинска Америка, Карибите, Европа и Централна Азија Георгина Бејкер, како и директорите во ММФ и СБ задолжени за Холандско-белгиската конституенца, Антони де Ланој и Кун Дависе се само дел од претставниците на двете меѓународни институции што доаѓаат во Скопје.

Потврдено е учество на 10 гувернери на централни банки и четврорица министри за финансии, а како главен говорник и учесник на една од панел-дискусиите е истакнатиот професор Луиџи Зингалез од Чикашкиот универзитет.

Министерот за финансии Драган Тевдовски смета дека ова е најголем настан во областа на финансиите во последната декада, а присуството на високите гости е потврда за за угледот што го уживаат Министерството за финансии и Владата, за прогресот на реформите во јавните финансии и истовремено е доказ за вистинската насока во која се движи нашата држава.

Во рамки на состанокот денеска во Министерството за финансии ресорниот министер Драган Тевдовски и потпретседателот на Светска банка за Европа и Централна Азија Сирил Милер ќе ја презентира Стратегијата за соработка помеѓу Светска банка и Република Северна Македонија.

Покрај тоа ќе биде потпишан и Меморандум за соработка со Меѓународната финансиска корпорација (ИФЦ) за поврзување на домашните компании со странски.

Меморандумот ќе биде потпишан од страна на потпретседателката на Меѓународната финансиска корпорација во групацијата на Светска банка Георгина Бејкер, министерот за финансии Драган Тевдовски и амбасадорката на Швајцарија Сибил Сутер Тејада. Проектот е финансиран од СЕКО.

-За нас проектот на Меѓународната финансиска корпорација за поврзување на странските и домашните компании е од големо значење, бидејќи тоа ќе го засили ефектот од влезот на странски фирми во земјава. За странските фирми тој ќе значи поврзување со квалитетни добавувачи, додека за домашните компании ќе значи дополнителна работа, можност за пласман на нови пазари и пренос на know-how, смета министерот за финансии Тевдовски.

На состанокот утре во рамки на основната тема „Како до поправеден систем за сите“, ќе се разговара за сѐ поголемата нееднаквост во доходот, факторите што го предизвикуваат овој тренд, долгорочните и краткорочните последици од тоа врз економскиот раст, но и во повеќе други сегменти од општеството и инструментите и политиките што им стојат на располагање на носителите на политиките.

Притоа, како што соопшти гувернерката Анита Ангеловска-Бежоска, посебен акцент ќе биде ставен на политиките за промовирање поголема конкуренција, ефективно користење на фискалната политика за редистрибутивни цели, подобрување на управувањето во сферата на финансискиот сектор и на инвестициите во човечки капитал.

Како дел од годишните средби на Економскиот факултет во Скопје пред студентите ќе одржат предавања Антони де Ланој извршен директор на ММФ и Кун Дависе извршен директор на Светска банка.

Во Холандско-белгиската конституенца, покрај Холандија, Белгија и нашата земја, членуваат и Босна и Херцеговина, Бугарија, Грузија, Ерменија, Израел, Кипар, Луксембург, Молдавија, Романија, Украина, Хрватска и Црна Гора.