Министерството за енергетика, рударство и минерални суровини ја поздрави 30-годишнината од присуството на Програмата за развој на Обединетите нации (УНДП) во Република Македонија, нагласувајќи дека ова партнерство е од клучно значење за државниот развој, особено во енергетскиот сектор.
На свеченоста присуствуваше и министерот, кој истакна дека три децении континуирана соработка покажуваат колку силно и стабилно партнерство може да создаде резултати кои траат. Тој посочи дека УНДП во изминатите години бил „исклучително важен и доверлив сојузник“ во бројни развојни процеси во земјата.
Министерството потенцира дека посебно значајна била соработката со УНДП во организацијата на Меѓународниот форум за енергија и одржлив развој, настан кој ја постави Македонија на мапата како сериозен партнер во глобалните енергетски процеси.
„Заедно покажавме дека Македонија може да биде домаќин на светот и испративме силна порака за нашата амбиција и подготвеност да играме поголема улога во глобалната енергетска транзиција,“ истакна министерот.
Од Министерството додаваат дека во годините што следат ќе продолжат да ја зајакнуваат соработката и да го интензивираат реформскиот процес со кој земјата се движи кон стабилна, одржлива и модерна енергетска иднина.
