Зголемен е интересот за вакцинирање по зголемениот број случаи со голема кашлица, информираа денеска во Вакциналниот пункт „Букурешт“ во Скопје. Тие најавија двосменско работење и работа в сабота.
Оттаму наведуваат дека по зголемениот број случаи со голема кашлица, од утрово е зголемен бројот на пациентите. Пред сѐ, пациенти – дечиња постари од 3 години, кои ги пропуштиле дозите од редовна вакцина, според календарот за вакцинација.
– Од утрово до 11 часот вакциниравме околу 60 дечиња. Ако бројките на дневно ниво вообичаено ни се меѓу 20 и 30, денеска бројката ни е двојно поголема. Тука е нели стравот на родителите, но и мерката за забрана во градинките за невакцинираните – изјави Сања Цилевска Младеновска, доктор педијатар.
Доктор Бети Гелејчевска Илковска појасни дека пред да ги вакцинираат децата, родителите најчесто прашуваат зошто се примаат вакцините во толку рана возраст, кој е производителот на вакцините, а и кои се несаканите реакции од примената вакцина.
Силвана Миркоска, главна сестра, информираше дека штотуку ги добиле насоките од Министерството за здравство – започнување со работа во две смени и работа во сабота.
